Annemarie: Trip to West-Canada Part II

Hoi zaemeSo muess langsam chli gas gaeu suesch isch de mi Reisebricht no nid fertig weni wider hei reise. U hie no mau nur so zur augemeine Information i uebernime keni verantwortig fuer mini miesei Raechtschribig, da derfuer isch ganz klar ueses System dschuld (weles ou immer!) Uf jede fau versuecheni jetze oeich chli drueber z brichte weissmer so eleini isch gange. I bi z Seattle losgfahre richtig Crater of the Moon National Park. U i bi no grad naebeme Baettler duere gfahre ufem waeg zum Highway. Naer hani daenk daem gibeni oebis so aus guete Schtart fuer dae naechscht abschnitt. U ha ou grad naebe ihm muesse haute waegere Ample u de hani e vermeintlechi 1 Dollar Note fuehre gno u se nim gaeh u ha near muesse merke dases isch e 10 Dollar Note gsi.  Ha naer eifach ghoffet dasii jetze de derfuer ou 10 mau meh Schwein ha.

I bi near no ca. 5 h gfahre u ha naer ufemne Zaeutplatz uebernachtet. Am naechschte Tag hani naer mau ine Garage muesse, nid wueu ig haet problem gha mit em Chare sondern nume wueu i nid ha gwuesst wo Transmission Fluid nache schuette u mir aui wuesse jtze ja dasme mit daem nid soet gspasse 😉 (dr Simu isch ja afe Expert uf daem Gebiet ==> Anm. d. Red.: Haaahaaa, isch gar nid luschtig, grrr) Item die ir Garage hei oemu naer uf mi wunsch hi “all waters and Fluids and all this stuff” kontroliert u i bi beschtens Grueschtet weiter gfahre. Das heisst bi nid so wit cho aber nid waegem Outo sondern waeg mire Souvenir Sucht. Es het i dere Stadt Pendleton e ganz bekannti Fabrik wo Dechine o so zueg macht mit Indianer Muschter. Dert bini gsi u imne angere Lade hamer mi erscht Cowboy Hat gchouft.  Naer bini du aendlech wider witer gfahre ( natuerlech vo jtze a immer mit em Huet ufem Chopf) richtig Park. Am naechschte Tag bini naer dert acho u es isch extrem heiss gsi. Dert hets eifach so Wueschte-aehnlechi Vegetation mit Lava Steine ueberau. Z Aenneli isch natuerlech naer ga wandere u wueu di Doefle nur Waege hei gha wo vo A nach B loufsch u naer oeber soetsch ha wo di chunnt cho hole mit emne Outo ( Ross u Wage waer natuerlech ou gange) hani muesse ar Strass na zrug tschiirge. Aui hiemi agluegt aus waeri nid ganz normau bis uf ne ganz naetti Park Rangerin wo mi naer het mit gno i ihrem Truck.

Naer bini de weiter richtig Yellostone National Park.  Doch da derfo es angers mau wot no chli ga Velo fahre ( es isch so schoen hi keni bloede Huegle)

bye bye u take care

Annemarie & Nik: Trip to West-Canada

Hallo Hallo bi wieder zrug ir Zivilisation (zuegang zum Internet = Zivilisation). Auso jtze bini ca. e Monet ungerwaegs gsi u ha sehr vieu gseh. Z. B. Mc Donalds, KFC, Burgerking, Kings Buffet, Red Robin, Buffalo Bill Grill u.s.w. Nenei ha natuerlech ou no es paar Sache gseh wo wuerklech sehenswaert si gsi ( auso nuet gaege Red Robin suesch isch de dr Daevu beleidiget ) wie dr Banff u dr Jasper National Park z Kanada u naer sicher dr Yellostone Park i de USA, u no gaeng Sache wo si schoen gsi zwuesche drinne. U Stedt wo idrueklech si gsi ( deu positiv u deu negativ ) u was natuerlech ou no z erwaehne isch si di super Museums ( fautschi mehrzahlform i weiss ) u z beschte no “Souvenirs Laede “. Die si auso teilwis extrem intressant, oemu use z finge was fuer schaeiss deu Luet ( inkl. mir) aues choufe.

So jtze zum Afang, es bizeli oebis heit dir ja scho mitbecho, naemlech das dr Nik u ig mit em Outo i Weschte si gfahre. Mir hei zwar zersch no e Umwaeg zu de Niagarafaeu gmacht, de weme die nid gseh het, de hetme Kanada aeue nid richtig bsuecht. Item naer simer i Weschte gfahre, u i ha gaeng chli muesse jammere woeu i ha Heiweh gha, aber gseh u erlaebt heimer glich schoens. Zwar nid bim ueber d Graenze ga id USA, dert heisinis naemlech ueses Fleisch ( zwoei laecherlechi Steaks) konfisziert u furt gschosse. Aber aebe id USA, liebi Leut, darfme ke Fleisch mit naeh. Uf jede fau simer naer witer wider richtig Kanada woeu suesch haettemer e risige uemwaeg muesse mache, wenmer nid duer d USA waere gange. Ide erschte paar Taeg z Kanada heimer naer scho ueser erschte Euche gseh, wie dir ja scho wuesst. U ga bade simer ou z erscht mau, imne chline See womer nid hei gseh was aues drinne ume schwuemmt, aber schoen isches trozdaem gsi. Nur dasmer naer am abe uf daem Campingplatz hei es Problem gha mit em Outo, isch weniger cool gsi. Mir hei eifach d Innebeluechtig nueme choenne absteue. I weiss no heut nuem warum, aber naer heimer aui Birli use gschrubt, woeu i am morge nid ha woeue mitere laere Batterie kaempfe. ( d Birli si uebrigens jtze immer no irgendwo im Chare).

U naer isches aebe so cho wies het muesse i bi z schnaeu gfahre. Es isch ewigs gange dert um di laetsche ume u i ha gfunge i heig di gaegend jetze de oebe gseh drum bini lockeri 140 gfahre u doerfe haetti 90. Naja u irgendwie isches haut de so gsi das ploetzlich es outo mit ganz vieu blinkende Liechtli hingermir haer gfahre isch. Dr Polizischt isch aber e ganz e liebe gsi u ou grad chli ueberforderet. E u uf jede fau bini “nur” 26 km/h z schnaeu gsi, vilech hani braemset oder de schtimmt dr Tacho nid im Outo ke ahnig. Am Schluss hani eifach 52 Dollar muesse zahle u guet isch gsi. ( Oemu fuer mi, moecht ja nid wuesse wie vieu i haet muesse zahle ir Schwiz).

Uf uesere witere Reis simer naer no bi vieune schoene Orte verbi cho u ou Orte wo weniger schoen si gsi. Aber fuer ues isches scho nume cool gsi di flachi Gaegend z luege. Mir si de ou no i verschiedeni Schtedt gange u vo dene hetmer Calgary definitiv am Beschte gfaue( het aeue e zaeme hang mit de Souvenierslaede di si super gsi.) Dert heimer ou no oeber lehre kenne, naemlech e eutere Ma vo Jamaika. Mir heinis zwar nur ca. 20 min mitim ungerhaute, aber wuesse duemer jtze raecht vieu vo ihm. Aer het ues vou gschtusset u mir hie nur oebe jedes 3 Wort verschtange, was ihn nid sonderlech gschtoert het. Es isch scho luschtig gsi aber naer bini du glich froh gsi wo der Bus isch cho u mir hei choenne adie saege.

Leider heimer di bekannti Stampede z Calgary verpasst, das waer es rise Ereignis gsi, het mir oemu dae Typ versicheret wo mer het Cowboy Stifle het verchouft. Z Calgary simer oemu de no raecht lang umegouneret. Uf uesem witere waeg simer unger angerem no im Jasper u im Banff Park gsi. Das si aeue di zwe bekanntischte National Paerk vo Kanada. Schoen isches dert wuerkli gsi aber arsch chaut. Ha uf au faeu ir erschte Nacht raercht gfrore u i gloube dr Nik het ou vom Suennele z San Francisco troeimt.

Witer isches naer gange richtig Vancouver u ungerwaegs het dr Nik no oebis ganz liebs gmacht. Aer het naemlech d heufti vo sim zaeut gschpaenndet. Das heisst vo mir de z Vancouver hei woeue z zaeut uf steue heimer gmerkt, das d heufti faeut. D Plachene si mit cho aber d verstrebige leider nid. Eh ja ha zwar no ufem Campingplatz agluetet u gfrag obsi aecht oebis hei gfunge, aber si hei nuet gha. Auso hiemit e Ufruef au aui vo naechschtens richtig British Columbia z Kanada goe u es haubs zaeut finge, es ghoert em Nik.

So u naer isch uesi reis zaeme definitiv am aend zue gange. Ds Seattle heimer no dr Daevu troffe, oder besser gseit aer het ues fruendlecherwis bi sich (naja isch zwar ja ou nid sis gsi aber glich) ufgnoh. Mir si mitim uf de Whibdey Islands gsi. ( Sorry Daevu wenis scho wieder ha fautsch gschribe). U naer heimer no einisch z Seattle uebernachtet. Das isch wuerkli e haerzigi Schtadt. U mir heis gnosse. Churz druf heimernis naer vom Daevu verabschidet u si zur Greyhound Busstation gange wo der Nik naer het der Bus nach San Francisco gno. I bi naer eleini duer d USA wider richtig Milverton gfahre. Meh zu daem Abschnitt es angers mau.

Anmerkung der Redaktion: Z Webalbum soet naechstens ou available si, d Madame Annemarie aka Renee Zellweger (Si gsehngi so us het dr Versicherigsberater gmeint) het noni d Fotos ussortiert. Love, Peace & Bluemli

Simu’s Birthday

Hi folks!

First, I would like to thank öich aune ganz härzlech für die viele liebe Glückwünsch und Gschänk. Schön das so vieu, trotz viele Kilometer und 6h Zytverschiebig, a mi dänkt hei U die wos verhanget hei: Eeeeasyy, s git kei schächtere Geburtstagsglückwünscher aus ig höchstpersönlech😉. Aber die meischte wüsses jo äuä eh scho us Erfahrig, gellet..

Das Jahr hani mi Geburi dörfe z Kanada fire. Sowit ig mi ma erinnere isches aber nid z erscht Mau gsi, ha gloubs dr 12 odr 13 Geburtstag scho während Kanada-Vacations chönne fiire. Anyway, s isch e schöne Tag gsi für mi! D Lüt hie, insbesondere d Priska, hei sich für mi is Züg gleigt und e schöni Geburiparty organisiert. Aber dr Reihe nah: Zum Zmorge hets Eggos (Waffle) gä, öppis womer bis jetz no nie gha hei. S isch tipp topp gsi, chani wärmstens witerempfähle. Denn bini, oder bsungers dr Fabio, az Gschänkliuspacke gange. Ha wie jedes Jahr tolli Gschänk becho, u das Jahr haut no chli meh setigi us Kanada. E ganz schöne Bluejays-Pulli vor Steff, e Baseball-Handsche vor Gastgäber-Family und e ganz originell gstaltete Guetschin fürne Blue Jays Baseball-Match vor Ännelä. Ufzeue chani hie nid aues, uf jede Fau nomau härzleche Dank a aui! Ou a mini Family deheime ir Schwiz.

Uf jede Fau simer de gäge Mittag z Vierte höch (Steff, Fabio, Ännelä & Simu) i Pinery Provincal Park a Beach go bädle. Z’Wätter isch säubstverständlech schön gsi, öppis angers hät nid zeut! Dert am See heimer de ou es feins Picknick gha und si gäge Obe wieder zrugg uf Milverton gfahre. Hey, sogar dr Pannechare het si Teil ane glungne Birthday bitreit: Är isch PANNELOS, jawohl ohni blue Smoke und tropfends Transmission Fluid, bis i Pinery abe und retour!! Hie ou es grosses Merci ad Person, äh s Auto vom Fritz🙂.

Am Obe hets de no e es gmüetlechs Brätle gä hie bir Priska & Family wo die nächste Verwandte aui atrabet si. E Highlight vom Obe isch natürlech d Quark-Torte vor Priska gsi: Si, auso d Priska, het ihri kreativi Adere zeigt! Danke dir nomau!

Chli vor Mitternacht bini de müed aber zfride is Bett und ha de Räscht vom Geburi no gmüetlech verpfuset..

Natuerlech heimer ou dasmau es paar Foeteli gmacht, aber nuet wuerklech spektakulaers.. –> Webalbum Birthday

Abschliessend moechti mi nomau ganz haerzlech bedanke fuer aui liebe Glueckwuensch und Gschaenk! Bis gli u haebet Sorg, saeimen

Amish School Sale

Geschter isch wieder mau öpis richtigs Canada-like ufem Programm gstange: Amish School Sale. Töne duets uf jede Fau scho mau interessant, don’t? Wieder mau e Simon-Definition isch agseit, würdi mau säge: Dr Amish School Sale isch e Openair-Aktion wo d Amish oder ou süsch People aui mögleche, oder eher unmögleche Sache düe (lo) versteigere. Grössteteils wärde Tier, vorauem Ross (über 200 Stk. das Mau) und süsch Maschine fürs Farmere verschuttet. Aber ou auderlei Hushaltartikle, Pflanze und sogar ganzi Schüüre si z ersteigere gsi. E Houptattraktion si sicher d Quilts, das si Bettüberzüg wo d Amish-Froueli us 42342*phii verschidene Stoffbitze zämenäie. Vieu Sache si ganz erläch gseit für rein gar nix gsi, kei Ahnig wär zum Geier dä Grümpu no hät wöue choufe🙂. Aber s isch äuä öppe mit üsere „zweite Weihnachten“-Aktion z vergliche; Aues wome het becho und nümme wot odr brucht, weg damit und möglichst no Profit drmit mache. Z gliche Bild trifftme jo ou ah, weme sich dür Ricardo.ch oder Ebay duet düreklicke. Trash everywere! Aber wiemer mit entsetzte festgstellt hei, fahre d Kanake hie ziiiemli uf so oldstyle-schrott ab. Die finge aues sexy, wo mir Schwizer ohni Abschidsträne im höche Boge i Ghüder schiesse🙂. Aber äbe, andere Länder, andere.. naja sägemer „Modetrends“. Sowit hie vo „Mode“ d Red cha si. Drum mi Tipp für die wo gli mau uf Kanada id Ferie wei: Packet so vieeeeeu oldstyle-müll ih wie nur Platz het i de Koffere, suechet nech hie e Amish School Sale, löt dä Garbage lo verhöckere und machet Kohle hehe.

Einizigartig isch aber uf jede Fau die ganzi Amish-Culture gsi wome hie het atroffe. Überau Manne mit „Cowboy-Hüet“, Froue mit Röck und Strümpf i aune bunte Farbe und vorauem die zigtausende vo Ross und Buggies. Buggies si d Wäge wo d Amish hie bruche zum Umefahre. Sogar de Bsuecherparkplatz isch gsplittet gsi; S het e Teil gha für d Bsuecher mit Autos und e Teil für d Ross und de Wäge. Es Buggy-Parking quasi. Ou die Buggies si extrem amüsant gsi teilwis, s het vo urchige Ahänger mit Autositze bis zu VW-Bus-ähnliche Ahänger aues gha. Houptsach em Zwäck entsprächend. Ah und hie no grad dr Link zum leider rächt dürftige Webalbum –> Webalbum Amish School Sale 

Luschtig isch ou d Sprach vo de Speaker gsi. Weme es paar Usschnitte vo ihrne Durchsage hät zämegmixt, häts es Country-Lied allererster Sahne gä. Verstange hetme eigentlech nid vieu, aber gsoundet hets herrlich! Unger dene erschwärte Kommunikations-bedingige hani de leider keis heisserwünschts Ross chönne ersteigere, hani doch keine gfunge wo für mi het wöue dr Bieter-Job übernäh:-). U dr Rücktransport wär de äuä ou e Misere worde, vorallem bim verzolle, hehe. Kouft heimer drum nüt ussert es paar Amish-Fries und e Hot-Amish-Dog.

Verehrti Läserschaft, zwungernermasse dueni mi vo öich verabschide (Ha grad d Mäudig becho das dr Junior chli Fieber het) und go mim Daddy-Job noche. Thanks fürs Läse, machets guet und häbet Sorg!

See ya soon, your swissanadian

Familytrip am Lake Huron & Toronto

Hello & Grützi mitenand. Hüt gits vo üs fründlechi Wort z vermäude, so i dere Art und wis wie mirs üs eigentlech ou vorgsteut hei. Nachere Woche gmüetlech iläbe hie bim Resu, Priska und Jungmannschaft hets üs richtig id „Wildnis“ usezoge. Wildnis isch nid z richtige Wort, iz kanadische Unbekannte isch scho passender. Üsi Rundi heimer de Umständ entsprächend rächt verchürzt, so dasmer trotz üsere Immobilität (D Steff het jetz doch afe es rächts und wunderschöns Büchli bechoJ) glich no chli öppis gseh. Ou dr chli Mister isch aube ou rächt schnäu müed vom Loufe. Am Zischti simer de bi wunderbarem Wätter mit Sack und Pack nördlech richtig Sauble Beach cruset. D Badhose hani säubstverständlech scho montiert gha, isch dä Strand doch chürzlech vom Readers Digest zum schönste Strand vo Kanada gwählt worde.  

Wär no grad die witere Bilder vo üsere Rundreis möchte aluege, dä fingt se wie gewohnt im Webalbum. à Webalbum Trip am Lake Huron & Toronto

Aber zrugg zur Reis. Nachem bädle isch d Fahrt mitem Dorf Tobermory als Ziel witergange. Das Dorf, oder äbe eher chline Kaff wie sich de usegsteut het, liegt ganz nördlich vor Bruce Peninsula und isch d’Abfahrtstell vor Fähre womer de druf hei wöue. Berühmt isch dä Ort ou für siner zwe National Park, de Bruce Peninsula National Park und de Fanthom Five Marine National Park. Da es bi üsere Akunft scho langsam am idunkle isch gsi, simer diräkt ufe Campingplatz „Tobermory Village Campground“. Dert heimer de uf Steffs Wunsch e Cabin gmietet für 2 Nächt. Die Kabine isch ganz jemütlitsch und sweet gsi. D Perle (jawohl mis SteffeliJ), isch uf jede Fau sehr zfride gsi, und das will was heissen. 

Am zwöite Tag vo üsem Trip simer de äbe i dä Bruce Peninsula N.P go loufe. Z ersch heimer aber e Stopp im bekannte Visitor Centre gmacht und si dert no z Museum go aluege. Dr Fabio het dert sini Kino-phobie z erscht mau chli chönne überwinde, drum isches ou us erzieherische Sicht scho mau e Erfolg gsi. Ufem aschlissende Churzumeschuene (Starchs Wort, I know [Kurzmarsch]) hätti e Body à la Chris Benoit (aber das isch e angeri kanadischi Tragödie) chönne bruche. D Steff het ou bau nümme wöue möge loufe, und ig hät gäge Schluss idealerwis 3 Persone ufem Buggu söue träge (Fabio, Steff und little Anonymous [Nachwuchs Nr. 2]). Gott sei Dank hani de aber d Steff no chönne zum Chare rugeleJ. Oder schiebe hehe. Muess grad chli uspasse wasi schribe, d Madame macht mitem Flöigetätscher Kontrolle hinger mir u luegt wasi schribe. Tja Herrrrre, so geits mängisch. Gäu SchatzJ. Da s hie so schöni Plätzli am See gha het, auso vorauem schöni Klippe, heimer üs entschide am Nami trotz aune mögleche Beschwärde no einisch e chlini Wanderig z mache. Mir hei z Tempo drosslet und die Wanderig isch de dasmau kes grosses Problem worde. D Natur het sicher hie vo ihrere allerbeschte Site präsentiert, die wunderschöne Klippe hei vieu schöni Föteli vo sech lo mache.

Für die mitem Extremchurzgedächtnis (Näme erwähni us Sicherheitsgründe keni) erwähni hie nomau dasmer ou die zwöiti Nacht ir gliche Cabin übernachtet hei. Am Morge isch de ganz früech Tagwach gsi (05:15), da mir uf d 07:00 Fähre hei wöue. So hets üs sogar no glängt, ines Restaurant go z erschte Canadian Breakfast mit Pancake ässe. Uf dr Fähre isches as usual gsi, wies haut ou isch. Anlegestell vor Fähre isch de es Dörfli uf Manitoulin Island gsi .Yes, tönt wunderbar Indianisch gäu. D Idylle trügt, resp. dr Name lügt, wöu Indianer hets wit und breit sit 100233 Jahr keni meh. Ömu für üs nid, und das isch wo zeut. Gäge Namitag simer de via Espagnola uf Sudbury cho. I dere Stadt hets eine vode gröschte Schornsteiofe wo für d Kupfer- und Nickelschmelzi brucht wärde. Z gröschte Chemi isch gloubs 382m höch (Alle Angaben ohne Gewähr, s chunnt aues usem, leider bi mir problematische, Haublangzytgedächtnis.) 

Wie dr obe ufem Bild scho chöit gseh, simer de no i d Big Nickel Mine. Das isch e Mine wo hüt für Bsuecher offe isch, d.h. dasme dert cha go Besichtigungstoure mache ungerirdisch. Z Wahrzeiche vo däm berühmte Museum isch dr Big Nickel, e kanadischi Münze in Grossformat (Durchmässer ca. 9m) us Nickel. D Tour dür d Mine isch nid würklech entspannend gsi. Bsungers füre Fabio und d Steff nid, wöus dene nid so wohl isch gsi im Dunkle und i dene änge Rüüm. Dr Daddy isch auso grössteteils drmit beschäftiget gsi, die zwöi irgendwie z entertaine damit nid z grosse Gränn losgeit:-/. Nachdäm das Adventure ou überstange isch gsi und mir de doch nid wo „böse Manne“ si überfaue worde wie dr Chlin gäng gmeint het, simer de wieder richtig Süde gfahre gäge Parry Sound. Ungerwägs heimer de no ar Steff si momentan lieblings Indianershop gfunge. Dert heimer wunderschöni Gschänkli und ou Souvenirs für üs säuber gfunge. Z Glück hets guet gmeint mit üs und drum heimer de dert ou no grad es freis Cottage (Feriehüsli) gfunge zum übernachte. Grad billig isch üs die Nacht nid cho, aber derfür isch d Lag perfekt gsi. Im Pris vor Übernachtig isch ou grad d Mieti vome Ruederboot inbegriffe gsi und so heimer z erscht mau i üsere Karriere ufeme schöne Seeli chönne go Bootle. Isch es tolls Erläbnis gsi für die ganzi Family und versoffe isch glücklecherwis ou niemmer. Haute nid vieu vo Schlichwärbig, aber hie glich no dr Link vo däm Mooselake für die wo gärn mau schöni Kanadaferie wie macheJ à http://www.mooselake.ca 

Am nächste Morge simer de nomau churz ufe See und de simer i Killbaer Provincal Park wo grad ir Nächi isch gsi. Dert hani mini Liebschti de ändlech chönne drzue überrede mau fürne Nacht z Zäut ufzschloh. Ladies & Gentleman, man glaubt es kaum, aber mir si i dene 5 Johr womer zäme si no nie gmeinsam ime Zäut übernachtet. Usegfunge heimer das ou ersch womer ir Nacht si dinne glägeJ. Da mir houptsächlech nach üsem Reisefüehrer d Ziel afahre, heimer i däm Park e schöne Sunneungergang dörfe erwarte. Und dr Reisefüehrer het sich es witers mau als Goldschatz profiliert, und üs e schöne, wenn ou churze Sunset beschert. 

Am Morge isch de dr Spassfaktor gleich Null gsi. Nix vo schönem Campingwätter, sondern Räge as never seen before in Kanada, z mingst vo üs. S’het dr gaaaanz Tag abepisset wases het möge. Ohni Pouse versteit sech. So isch üs nix angers übrig blibe, aus bi däm Hundewätter z Fäud fluchtartig z ruume und z verloh. Dr Räscht vom Tag heimer grössteteils mit Autofahre verbrunge und si de schlussändlich z Toronto, resp. Markham im Hotel übernachtet. Dert heimer de ou ändlech üser dräkige Chleider chönne wäsche. Am nächste Tag isch e Usflug i Toronto Zoo ufem Plan gstange. Es sig dr schönst Zoo vo Kanada und ou sehr gross. Schön ischer würklech gsi, nur hets bau meh Chinese u süsch lüt z gseh gä aus Tier. Aber zmingst am Junior hets sehr gfaue.  Pic Toronto Zoo Am Obe simer de no churzerhand ufe CN Tower gange wöu dr Daddy scho lang gstürmt het. D Steff und dr chli Zapfe hei zwar zersch nid so wöue begeisteret si, uf dä gross Turm use z seckle, aber schlussändlech hets dene zwöi ou sehr passt. Dr Fabio isch begeisteret gsi und het när gäng gfrogt öbmer nomau ufe „gloss tuum“ ufe göngi.  

Übernachtet heimer de wieder im gliche Hotel z Markham, are Vorstadt vo Toronto. Dr nächst, und ou letscht Tag vor Reis heimer de nomau z Toronto verbrunge, womer chli si go Sightseeing mache am Hafe usw. Natürlech het ou dr Toronto Blue Jays Shop (Das isch dr offiziel Shop vom Toronto Baseball Team) nid dörfe fähle, da dr Simu jo scho sit Johre e Fan vo dene isch. Gäge obe simer de, glücklech aber rächt uf dr Schnore z Milverton acho. Und wüsster was z beschte a Trip isch gsi? KEI EINZEGI PANNE HEIMER GHA!! Das isch phänomenal. Härzleche Dank a dere Steu ad Ännelä, wo üs ihres Auto het gä z bruche.

Trip to Pannenland (eh. Niagara Falls & African Lion Safari)

Liebsti Online-Stresstherapheute / Stresstherapheuteusen Stressbewältigung. Das isch z Stichwort für mi hütig Post. D Begrüessig chunnt drum ou nid vo ungefähr, si söt adüte, das dir bim läse vom Bricht indiräkt ufgforderet sit, mit üs üse Stress z teile. Danke, Messi scho zum Vorus. D’Rächnig für allfälligi Depressionsbehandlige chöiter uf Milverton id Autogarage schicke! Aber jetz zum Grund vo däm Gjammer. Säubstverständlech isches wieder üsem Problemching, z’Auto, gsi wo üs Ärger brocht het. Eigentlech wär z Ziel e Trip i African Lion Safari Park und de aschliessend d’Besichtigung vo de Niagara Falls inkl. Übernachtig gsi. Auso grad vorewäg: z Ziel heimer erreicht, d.h mir hei das aues gseh womer hei wöue und es isch würklech guet gsi. Aber äbe, der Weg ist das Ziel.. Oder i üsem Fau äbe z Problem. Dr Chare het dasmau no meh Theater gmacht aus bishär. Monstermässig sogar. Aber uebers Problem an sich woti hie gar nid witer igoh, s interessiert naemlich eh niemmer. {Ja, die ganz intelligaente Laeser heis inzwuesche scho lang gmerkt, ig schribe mitere englische Tastatur}. Uese erst zwueschehalt isch bim African Lion Safari Park gsi. Das isch nach mire Definition e Wildlife-Zoo-Park wome allerlei Tier cho go luege. Nid nur d Tier sondern ou de Pris lot sich lo gseh. Dae Tag het ues lockeri 150.- kostet. Aber cool isches gsi und es het bsungers am Junior gfaue. Saeubstverstaendlech heimer ou hie some pics gschosseà Webalbum African Lion Safari Park  

Uf jede Fau isch ues ufem Waeg zu de Niagara Falls die allerletschti Bruegg, sagehafti 50m laeng und grad direkt vorem Motel, no fasch zum Verhaengnis worde.. Dr Chare het prompt am Afang vo dere (Si isch ir Mitti chli hoecher gsi, auso e Bogebruegg quasi) ueberhoupt nuemme woeue. Weni Gas gaeh ha het dr Chare nur no gschliffe und es isch kei Millimeter meh vorwaerts gange. Eifach rueckwaerts, aber nur dankere Portion Erdaziehigschraft. Ja das isch oberbitter! Da ig aber us de fruehere Problem chli glehrt ha, hani doch de no e 1L Oel drbi gha und dr ganz Chuebu fuer die letschte paar Meter inegschuettet. Aber man glaubt es kaum: Chum bini ir Mitti dobe bim Brueggli acho, hani scho wieder kei Oel me gha und nix meh isch gange. Mit Glueck hani de no chuenne vors Motel rolle. Z Motel saeuber isch de aber de wider e positivi Ueberraschig gsi. Am naechste Morge isch z gliche Spili witergange. Und dasmau hets naebe daem dasmer kei Oel gha hei und praktisch nuemme hei choenne fahre heimer de ou no e Platte gha. Obercoool. Nachem Bsuech vom Autodok simer de doch no ad Niagara Falls cho. Das isch es Naturwunder wies wohl nid maengs git uf dr Waeut. Bilder sagen mehr als Worte, eh voila.à Webalbum Niagara Falls 

Uebere Heiwaeg mani gar nuemme schribe. S isch scho fasch tragisch worde mitem Chare. Eigentlech haettemer ca. 3h brucht fuers heifahre, s isch aber de gaege 6h zuegange bismer si deheime gsi. Nach ca. 13 Stopps (jawohl Pannestopps) und 8L(!!!!!) transmission fluid. Beweis gefaellig? à 

Deheime acho simer haub tod und Luet ig saege euch, i ha scho vieu erlaebt und dueregstange, aber so noch ame Naervezaemebruch bini no saeute gstange;-). IG HASSE DAE CHARE! Scheissteil. Basta. Endefeuer. Aus.

Familie komplett

Herrschafte und Herrschafteuse, fröitmi das dir wieder mau uf mim Blog verbi lueget. Leider hets jetz doch rächt lang duuret, bisi wieder mau Zyt gfunge ha, mini Online-Plapperchischte zu aktualisiere. Mittlerwile bini nümme „elei“ hie äne, sondern ha mini Truppe wieder komplett. D’Steff und de Fabio heis trotz auer Angst und Sorge doch no uf Milverton gschafft. De Flug isch sowit ig weiss ohni Schwirigkeite verbi gange und ou z Umstige in London isch zum Glück problemlos abglofe. D Ireis z Kanada isch für die beide Luschtige zwar ou chli müehsam gsi, aber gloubs ou chli weniger hektisch aus bi mir. Isch guet so. Dr bescht isch de no uf dr Autofahrt vo Toronto uf Milverton passiert: Dr erscht Kontakt mit dr Canada-Police scho nach ca. 1.5h UfenthaltJ. Ufem Highway het üs d Bulleria usepfiffe wöumer „blue smoke“ heige hingerem Auto noche! Das würd eigentlech e höchi Buess gä aber d Poliziste hei de erbarme gha mit üs, wöu si gseh hei dasi miner Liebschte ersch grad z Kanada acho si. Dr Witz isch aber, dasi dr Chare grad am vordere Tag bim Mechaniker gha ha wäge däm scheisse Rouch. Aber dä het äuä ke guete Job gmacht. Anyway, das Thema Auto het mittlerwile scho kultstatus hie und i wirde nächstens witeri Stories über üsi Autopanne verfasse.Mir wünsche öich e gueti Zyt und häbet Sorg! Greetings vo üs drü

Beach, sunnebrand & a smoking car

Howdy!

Nachere Wuche Sendepause isch z Sprachrohr Kanadas (Nei nid Gottes) wieder back onstage. Säubstverständlech hani ou hüt wieder nid meh aus e churzi Räubergschicht z biete. Aber wie chönnts ou angers si. Ha mittlerwile usegfigured (Das bruche hie d Swissanadians fürs Wort “usegfunge”) dasi mit mim sehr lockere Schribstil einzigartig bi, resp. haut nid Wing-like:-). Anyway…

Nachere Wuche working bini letscht Sunndi wieder mau ufne chlinere Ego-trip gange (Es is verussichtlech dr letscht gsi, da miner Schätzus die Woche ou wärde iträffe). Uf jede Fau bini dasmau nid i Weste a Huronsee, sondern südlech gäge Lake Erie gfahre. Churz nach Mittag bini de schlussändlech a mim Reiseziel, de Long Point Provincal Park, aglangt. Mit wandere isches dasmau nix gwesn, das kenne die hie äuä nid. D Kanadier bevorzuge sowieso d Marshmallows am hiking, was leider allzu hüüfig nid übersehbar isch. Aber äbe, das ghört ja wieder unger d’Rubrik “Fastfood”. Scho ar Bsetzig vo de Parkplätz hets hie meh nach Adria als nach wildlife-area usgseh. Und das Bild het nid dosche. Definitiv nid. Ufe erst Blick hani gmeint a de Fleischhüüfe ah es si e ganzi Kompanie vo Walfische gstrandet. Aber ufe zwöit Blick si de doch ganz klar ca. 1034324 chillendi Kanadier z erkenne gsi. Mit Sunneschirme. Und Grills. Und Fastfood. Und Huustier. Und schön bruner Hut. Bimer vor cho wienes Bleichgsicht a däm Strand, aber das isch ja ir Schwiz aube nid vieu besser:-). Das mit dr bleiche Hut het sich de aber no söue ändere, aber später meh drzue. Da ig nid würklech gluscht uf sone Openair-fleischmarkt ha gha, bini no chli am Strand witerglofe und ha de doch no gnüegend freie Platz gfunge. No es Wort zum Strand: Amazing! Aber lueg säuber:

Natürlech het hie z’bädle nid dörfe fähle und ig ha mir ou es paar Momänte vo däm deftige kanadische Sunnebad gönnt. Würklech nur churz. Aber z’lang. Definitiv vieu z’lang, wie sich de usegsteut het deheime am Obe im Bett. Et voilà, das isch z’Produkt vo sich säuber icreme. S’isch schone scheiss das mir Mönsche nur so churzi und unbeweglechi Arme hei:-). D’Gränze vo dert woni säuber ha chönne icreme zu dert wo leider anschinend kei Sunnecreme isch häre cho gsehtme gloubs gnue dütlech. Ladies, das isch unsexy hehe. S’hät jo eigentlech ou nid söue seksi wärde.. Aber wüsst dir, ig aus tröie Liebhaber vo mim Schätzu lo mir doch lieber dr Rügge lo verbrönne aus mi vo sore ugly Kanadiereuse lo icreme. Das isch i däm Sinn auso nid Dummheit, sondern e romantische Liebebewis wo seinesgleichen suecht:-). Herre: Gesehn? (Läck brönnt das, machts nid, lieber Krach:-))

Bim heifahre bini de no bire ziimli ufdringliche Pizza-hut-servierdüse go mis Znachtässe (Yes, Fastfood forever) “gniesse”. Nach däm ig die mit Müeh und Not ha chönne abwimmle, het sich scho z’nächste Problem ahbahnt: Dr Chare het no schnäu wöue dr Geist ufgäh. Plötzlich hets deftig afo rauchne im Auto inne und de hani de doch mau müesse ahaute. Wases gnau isch gsi weisi hüt noni, aber s’isch nid uf dr Hube sondern vo ungerem Auto cho. Das isch bad. Aber heicho bini de trotzdäm no, hane eifach heiquält. Und morn muess mis Baby id Garage.. Hoffe dasne no chli cha fahre, het doch immerhin scho fasch locker 300’000km druffe.

So, that’s it for the moment. Pics hani wie gewohnt im Webalbum –> Webalbum Ausflug Long Point Provincal Park. Es si noni aui bereit, morn ladi de no chli meh ufe.

Häbet Sorg, gueti Zyt und äbe: Love, peace und blüemli. Your Swissanadian

Dodge Rodeo tour in Milverton

Hi folks!

Sunndi obe, was fürne ermüedendi Ussicht. Es geit eim doch überau glich, dr Mändimorge-Aschiss existiert leider ou hie.. Aber immerhin git das mir d Gwüssheit, dasi mitem Schwitzerlande nid dr einzig Ort mit däm Läbensproblem troffe ha. Also, don’t worry, “Gring ache und seckle”, oder ähnlech. Aber genug des Gejammers, hami hüt nid wöue mit Melancholie umenang schlah, sondern ha wieder mau e nätti Story für öich bereit: Es isch Rodeo-time gsi in Milverton. Für mi isch das z erste Mau gsi, woni sone Cowboy-competition ha dörfe miterläbe. Säubstverständlech hani ou hüt wieder es paar Pix und Movies gmacht für die wos interessiert. –> Webalbum Rodeo Milverton

Für aui die wo ou no nie es Rodeo hei dörfe erläbe möchti doch schnäu e simonsche Begriffsdefinition mache vo “Rodeo”: Eine openairähnliche Outdoorveranstaltung, an welcher waghalsige Showeinlagen einiger (möchtegern) Cowboys unter tosendem Beifall der vorwiegend männlichen Sensationstouristen präsentiert werden. Auso quasi z Gurte-Openair, jedoch ohni Punks aber mit Cowboys, ohni Bands derfür mit Horses, Bulls und Deers (John Deer, zueständig für d Wärbig:-)) und anstatt übermässigem Alkoholkonsum no exzessiviere Sugarconsum. So eifach isch das, u nid angers.

Es het diversi “Sportarte” gä, vo Bullriding, über Cowgirl-highspeed-riding zu Kalb-mit-Lasso-fangen hets aues z gseh gä. Für d Unterhaltig vom Publikum het bsungers e Clown gsorgt wo sehr spektakuläri Jokes brocht het. Er isch früecher säuber eine vo de bester Bullriders gsi, drum heter d Tier bestens kennt und het so rächt vieu chönne risikiere. Bim Bullriding am Schluss ischer gäng so ime orange Fass gsi und het d Bulle nachem Ride zu sich häre glöckt und het sich de immer im letschte Momänt is Fass ine verschlüffe, damit ihm nüt passiert. Mängisch isch e Bulle vougas uf das Fass losgange und het das Fass inkl. Mister vou umebrätscht. Aber däm drinne hets gloubs no bau am meischte Spass gmacht. Wasmi aber no erstunt het, isch das die Type nid eifach ohni grossi Vorbereitig uf die Tier ufe si, sondern dass sie e rächt seriösi Vorbereitig hei gha uf ihre Ride. Die Vorbereitig het scho am Afang vom Rodeo agfange, wo aui zäme fürne unfallfrei Show für Mönsch und Tier bätet hei. Anschliessend het säubstverständlecho u d Canada-Hymne nid dörfe fähle. De hani gseh, das si ou mit Schutzchleidig nid spare: Ellbogeschutz, Panzerig füre Buch und Rügge, Bandagen und teilwis sogar Helme (bi Ching) si unumgänglich.

Yes, das wärs sowit zu däm Thema. Es isch spät und ig ma nümme schribe, obwous no vieu z verzelle hätgä. Am gschidschte luegter mau d Videos ah, die gä de Event am beschte wider. Greetz und häbet sorg, ya swissanadian

Usflug i Pinery provincal parc

Come say bonjour! Und es isch äbe doch no mau Weekend worde, herrlich. Da die Lüt hie beschäftiget si mite Vorbereitige fürnes Breakfast wo si düe organisiere und dürefüehre, hani mi churzerhand entschlosse, säuber chli go Kanada z entdecke. Da morn in Milverton es Rodeo stattfindet woni unbedingt wot go luege, hani aber kei grossi Sach wöue mache. Ir Nöchi (ca. 1,5h Autofahre) ligt äbe dä Pinery provincal parc. Nach de mittlerwile scho bau standardmässige chlinere Umwäge, säubstverständlech planet wie geng, hani de dä Park gfunge. Ungerwägs bini no schnäu z Züri verbi –> guggst du pic

Ufeme 1,5 stündige hiking trip wo düre Wald gange und schliesslech a beach vom Lake Huron gfüehrt het hani mi fitnessmässig chli chönne betätige. Bim loufe ufem Pfad hani gäng chli i Waud usegluegt und ghoffet dasi gli Mau öpis interessants erkenne.. Und voilà, lue do.. Am beschte luegsch grad säuber ufs Bild und suech:-)

Aber jetz no schnäu zrugg zum beach. Dä Strand isch herrlich gsi, wie z Griecheland. Ohni z übertribe, wöu nid nur s Wätter gstumme het, sondern ou de Sand xtrem fiin isch gsi. Und people hets ou nid vieu gha, me het nur öppe hie und da es päärli hinger emne Büschli entdeckt hehe. Nei, es isch kei FKK-Strand gsi, vergisses. Mir si hie seriös z Kanada, gäu Rossignol?

Aber jetz no zrugg zu mim grossartige und einmalige “Findet-Walther”-Game vo obe: Hesch no gseh dr Elch?? Nid?? Schade, Ig nämlech ou nid:-). Dä ig kener spektakuläre Animals gseh ha, hanimer erloubt mau eifach d Böömle z fötele und öich nach Tier lo z sueche. Wenn öpper something strange oder beautiful oder amazing odr ugly gseh het –> contact me. Dangjeschön hehe.

Danke für d Ufmerksamkeit, fürs sueche und säuber z Schuld fürs Läse. Love, peace und Blüemli (In Anlehnung an Ronny L. aus N., (2007)). Liebe Gruess a aui und take care

P.s Hie no de Link für zu de wenige Föteli vom Park für die wos interessiert und natürlich bsungers füre ufmerksam Expert im Bereich vom schwarze ostkanadische Waudlandgoudfisch [wiss.: lustrum terrus carassius auratus] em Davidlyboy:-). Et voilà. –> Webalbum Pinary provincal parc